གནས་ཆུང་ལ་༸སྐྱབས་རྗེ་ཕ་བོང་ཁ་དང་འབྲེལ་བའི་དོགས་འདྲི།

http://shugdenfacts.com/gadenjangtsemonastery/ཕྱི་ལོ་༡༩༧༨ཕྱི་ཟླ་༦ཚེས་༡༣ཉིན་སྩལ་བའི་བཀའ་སློབ་ནང་གསལ།
 

གནས་ཆུང་ཆོས་རྒྱལ་ཆེན་པོ་ལྷ་ཕེབས་བཞིན་པ།

གནས་ཆུང་ཆོས་རྒྱལ་ཆེན་པོ་ལྷ་ཕེབས་བཞིན་པ།

    ཡང། ངས་གནས་ཆུང་ལ་དེ་འདྲ་ཡིན་ན། ྋསྐྱབས་རྗེ་ཕ་བོང་ཁ་དངོས་གནས་དྲང་གནས་རྣལ་འབྱོར་པ་རྟོགས་པ་ཐོབ་པའི་བླ་མ་ཚད་ལྡན་ཞིག་ཡིན་རྒྱུ་རེད། དེས་ཆོས་སྐྱོང་ཚད་ལྡན་ཞིག་ལ་ཞལ་གྱིས་བཞེས་ཀྱི་ཡོད་པ་རེད། དེ་བཞིན་འདིའི་སྲོག་གཏད་ཀྱི་བརྒྱུད་པ་སྟག་ཕུ་རྡོ་རྗེ་འཆང་ལ་དག་སྣང་བྱུང་སྟེ་འདུལ་འཛིན་གྲགས་པ་རྒྱལ་མཚན་ཞལ་གཟིགས། དེ་ནས་བྱུང་བ་ཡིན་པ་རེད། དེ་གང་འདྲ་ཡིན་ནམ་ཞེས་དོགས་གཅོད་ཞུས་པར། ཆོས་སྐྱོང་གིས་ཐག་ཆོད་པོ་བྱས་ནས་གསུང་པ་ལ། ྋསྐྱབས་རྗེ་ཕ་བོང་ཁ་ལ་རིག་འཛིན་ཆེན་པོ་ཞེས་མཚན་བསྟོད་གསུང་གི་འདུག

     རིག་འཛིན་ཆེན་པོ་དེའི་སྐུ་ཚེའི་སྨད་ལ་ནོར་འཁྲུལ་ཆེན་པོ་བྱུང་ཡོད། ནོར་འཁྲུལ་ཆེན་པོ་བྱུང་བའི་རྐྱེན་བྱས་ནས་ང་པེ་དཀར་རྒྱལ་པོ་འཁོན་པ་ཅི་ལ་ཡིན་ཏེ། རིག་འཛིན་ཆེན་པོ་དེའི་སྐུ་ཚེ་མཛད་པ་ཐ་མའི་སྐབས་རྣམ་རྟོག་མི་ཤིས་པ་ཇི་བྱུང་རྩད་གཅོད་གནང་ན་མཁྱེན་པ་ཡོད། དེའི་ཡང་སྲིད་རྒྱ་གར་ལ་གཤེགས་པ་དེ་གཤེགས་པའི་སྐབས་ལའང་མཚན་མ་ངན་པ་ག་འདྲ་བྱུང་རྩད་གཅོད་བྱས་ན་ཤེས་པ་ཡོད། དེ་ཙམ་དུ་མ་ཟད། དེའི་ཡང་སྲིད་བརྒྱུད་མར་བཅས་པའི་སྐུ་ཚེ་མཛད་འཕྲིན་མཐའ་འཁྱོངས་ཡོང་གི་མ་རེད་ཅེས་གསུང་གི་འདུག

   ྋསྐྱབས་རྗེ་ཕ་བོང་ཁ་ལ་གྲ་མ་འགྲིགས་བྱུང་བ་དེ་མི་མང་པོས་ཤེས་ཀྱི་ཡོད་པ་རེད། མང་པོའི་བསམ་ཚུལ་ལ། ྋསྐྱབས་རྗེ་ཕ་བོང་ཁ་དགེ་ལུགས་པའི་བསྟན་པའི་ཐོག་ལ་མཛད་རྗེས་ཆེན་པོ་བྱུང་བ་དེས་རྐྱེན་པས་རྙིང་མ་སོགས་གྲུབ་མཐའ་གཞན་ཕྱོགས་ནས་མཐུ་གཏད་ཡོད་པ་རེད་ཅེས་ངན་ཁག་དེ་རྙིང་མ་བའི་ཐོག་ལ་གཡོག་གི་ཡོད་ཀྱང༌། གནས་ལུགས་ངོ་མ་དེ་འདྲ་ཡིན་བཟོ་མི་འདུག དེ་དམར་ནག་གཉིས་ཀྱི་ཐོག་ནས་བཀའ་ཆད་ལྟ་བུ་ཡོང་གི་ཡོད་པ་འདྲ།

     དག་སྣང་སྐོར་ལ། དག་སྣང་ལ་གཉིས་ཡོད། རྩ་གསུམ་ལྷ་ཡི་བྱིན་རླབས་ཀྱི་ཐོག་ནས་བྱུང་བའི་དག་སྣང་གཅིག་དང༌། བར་ཆད་ཀྱི་དབང་གིས་བྱུང་བའི་དག་སྣང་གཅིག་སྟེ་གཉིས་ཡོད། འདི་བར་ཆད་ཀྱི་དབང་གིས་བྱུང་བའི་དག་སྣང་དེ་ཨེ་ཡིན། ཞེས་གསུང་གི་འདུག དེ་འདྲའི་གནས་ཚུལ་ཛ་དྲག་པོ་དང༌། ཁ་ནས་ཤོད་མི་ནུས་པ་ལྟ་བུ་འདུག