ཕྱི་ལོ་ ༢༠༠༦ ཟླ་ ༣ ཚེས་ ༢༧ ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་དཔྱིད་ཆོས་སྐབས་གཞིས་ནས་འབྱོར་བའི་སྤུན་ཟླ་གཙོ་བོར་གྱུར་པའི་བོད་འབངས་རྣམས་ལ་དོལ་རྒྱལ་སྐོར་སྩལ་བའི་གལ་ཆེའི་བཀའ་སློབ།
ྋསྐྱབས་རྗེ་ཕ་བོང་ཁ་རིན་པོ་ཆེར་མཚོན་ན་སྐུ་ཚེའི་སྟོད་ལ་རིས་མེད་ཀྱི་ཉམས་བཞེས་གནང་མཁན་ཡིན། རིམ་པས་དོལ་རྒྱལ་དང་འབྲེལ་བ་བྱུང་ནས་གནས་ཚུལ་གཞན་སྨོས་ཅི། རྟ་མགྲིན་ཡང་གསང་ཡང་བླ་མ་མཆོད་པའི་ཚོགས་ཞིང་ནང་བཀོད་ན་མི་འགྲིགས་པའི་བཀའ་གནང་བ་ཁོང་རང་གི་རྣམ་ཐར་ནང་གསལ་ཡོད། ཁོང་གི་རྣམ་ཐར་བོད་ནང་པར་བརྐོས་པ་ལས་རྒྱ་གར་ནང་པར་བརྐོས་པ་མིན། གནས་ཚུལ་དེ་དང་དེ་འདྲ་བ་མང་པོ་ཞིག་ལ་བརྟེན་ནས་ྋགོང་ས་བཀའ་དྲིན་ཟླ་མེད་སྐུ་གོང་མ་དགོངས་པ་གཞན་དོན་དུ་གཤེགས་པའི་སྐབས་ྋསྐྱབས་རྗེ་ཕ་བོང་ཁའི་སློབ་མ་བཞི་སྡེ་ཏཱ་ཟུར་ཟེར་བའི་རྨི་ལམ་དུ་དོལ་རྒྱལ་ནས་དགུ་རྫོགས་གནམ་གང་ལ་ཡིན་དཱ་ཞེས་སྐད་གསང་མཐོན་པོས་ལུང་བསྟན་བྱུང་བ་རང་གི་བླ་མ་ྋསྐྱབས་རྗེ་ཕ་བོང་ཁར་སྙན་གསེང་ཞུས་པའི་ལོ་རྒྱུས་ཡོད། ཚང་མས་ཤེས་གསལ་ལྟར་སྐད་གསང་མཐོན་པོ་ཞེས་པའི་ཚིག་འདི་སྤྱིར་བཏང་གི་སྐད་ཆ་ཞིག་མིན་པར་གཏམ་བཟང་པོ་ཞིག་སྤྲོ་བ་དང་བཅས་ཏེ་སྐད་གསང་མཐོན་པོས་བསྒྲགས་རྒྱུའི་གོ་དོན་ཡོད། འོན་ཀྱང་མྱ་ངན་གྱི་སྐད་ཆ་ཞིག་ཡིན་ན་ཡིད་ཞུམ་པའི་སྒོ་ནས་བརྗོད་དགོས་པ་ལས། སྐད་གསང་མཐོན་པོའི་ཐོག་ནས་བརྗོད་རྒྱུའི་གཏམ་ཞིག་མིན། འོན་ཀྱང་བཞི་སྡེ་ཏཱ་ཟུར་རམ། རྨེ་རུ་ཏཱ་བླ་མ་ཟེར་བའི་ྋསྐྱབས་རྗེ་ཕ་བོང་ཁའི་སློབ་མ་དེར་དོལ་རྒྱལ་རྨི་ལམ་དུ་བྱུང་ནས་དགུ་རྫོགས་གནམ་གང་ལ་ཡིན་དཱ་ཞེས་སྐད་གསང་མཐོན་པོས་ལུང་བརྒྱབ་པ་དང༌། རྨི་ལམ་ྋསྐྱབས་རྗེ་ཕ་བོང་ཁ་རིན་པོ་ཆེར་སྙན་གསེང་ཞུ་སྐབས་བརྟག་དཔྱད་བྱེད་རྒྱུ་ཡོད་ཅེས་བཀའ་ལན་གནང་ཡོད། རྗེས་སུ་བོད་ཟླ་བཅུ་པའི་གནམ་གང་ལ་ྋརྒྱལ་མཆོག་སྐུ་གོང་མ་དགོངས་པ་ཆོས་དབྱིངས་སུ་ཐིམ་པའི་ཡིད་སྐྱོ་བའི་གནས་ཚུལ་ཐོན་པའི་སྐབས། སྔོན་དུ་དོལ་རྒྱལ་ནས་དགུ་རྫོགས་གནམ་གང་ལ་ཡིན་དཱ་ཞེས་བཤད་པ་དེ་སྐུ་གོང་མ་དགོངས་པ་རྫོགས་པའི་ལུང་བསྟན་ཡིན་པ་འདྲ་ཞེས་ྋསྐྱབས་རྗེ་ཕ་བོང་ཁ་རིན་པོ་ཆེས་གསུངས་པ་ཁོང་རང་གི་རྣམ་ཐར་ནང་གསལ་ཡོད། ལུང་བརྒྱབ་པ་མི་འགྲིགས་པ་མིན་ཡང་སྐད་གསང་མཐོན་པོས་བསྒྲགས་ཟེར་བའི་ཚིག་འདི་ཁྱད་མཚར་ཞིག་རེད།
ཚང་མས་བསམ་བློ་ཞིག་ཐོངས་དང༌། ྋརྒྱལ་མཆོག་སྐུ་གོང་མ་བོད་ཁ་བ་གངས་ཅན་ལྗོངས་ཀྱི་བསྟན་འགྲོ་སྤྱི་དང༌། ལྷག་པར་དགའ་ལྡན་ཕོ་བྲང་པར་བཀའ་དྲིན་ཅན་དུ་གྱུར་པའི་བླ་མ་བཀའ་དྲིན་གྱི་བདག་ཉིད་ཅན་འདི་སྐུ་གཤེགས་པའི་སྐབས་དགའ་བསུ་ཞུ་མཁན་དེ་ཡག་རྟགས་རེད་དམ། ཡང་ན་སྡུག་རྟགས་ཡིན་བསམ་བློ་གཏོང་དགོས། སྐུ་གོང་མ་སྐུ་འཚོ་བཞུགས་སྐབས་ྋསྐྱབས་རྗེ་ཕ་བོང་ཁ་རིན་པོ་ཆེར་བཀའ་ནན་ཕེབས་པ་མང་པོ་ཡོད་པའི་ནང་དོན་ཚན་གཅིག་དོལ་རྒྱལ་བསྟེན་གསོལ་གྱི་གནད་དོན་འདི་ཡིན། དོལ་རྒྱལ་སྐོར་བཀའ་ནན་ཕེབས་ཏེ་ཕ་བོང་ཁ་རིན་པོ་ཆེར་སྐུ་ངལ་འཕྲད་ཡོད་པར་བརྟེན། སྐུ་གོང་མ་གཤེགས་རྗེས་བཀའ་ནན་ཕེབས་མཁན་མེད་པས་ཐུན་མོང་གདུལ་བྱའི་སྣང་ངོར་ྋརྒྱལ་བའི་མཛད་འཕྲིན་ལ་ཀྱག་ཀྱག་གནང་བའི་གན་ས་ཚུལ་ཡོང་མི་སྲིད་པ་མིན། དངོས་ཡོད་ལོ་རྒྱུས་ཀྱི་བྱུང་བ་དེ་དག་ཆ་ཚང་རྟོགས་ནས་བློ་གཟུ་བོར་གནས་པའི་ཐོག་ནས་ལེགས་ཉེས་འབྱེད་པའི་རྣམ་དཔྱོད་ཀྱིས་དཔྱད་པ་བྱས་ཏེ་ཐག་གཅོད་བྱེད་རྒྱུ་གལ་ཆེན་པོ་ཡིན། ངོས་ནས་དོལ་རྒྱལ་དམ་བསྒྲགས་བྱེད་པའི་རྒྱུ་མཚན་ཡང་གོང་གསལ་གྱི་གནས་ཚུལ་དེ་དང་དེས་མཚོན་པའི་རྒྱུ་མཚན་མང་པོ་ཞིག་ཡོད་ལ། ངོས་སྒེར་ལ་རྨི་ལམ་གྱི་མཚན་མ་མང་པོ་བྱུང་བ་དེ་ཚོ་ཆ་ཚང་བཤད་རྒྱུ་དགོས་པ་ཆེ་བ་མེད། གང་ལྟར་ཕྱི་ནང་གི་གནས་ཚུལ་དང༌། མཚན་མ་འདྲ་མིན་མང་པོ་ཞིག་ཡོང་གི་འདུག དེ་དག་ཁྱེད་རང་ཚོའི་བློ་ལ་ངེས་པ་བྱེད་དགོས། ཡིག་ཆ་དགོས་ན་མང་པོ་ཡོད། ཡིག་ཚང་སོགས་འབྲེལ་ཡོད་ལ་སྐད་ཆ་དྲིས་ན་འགྲིགས།
ཕྱི་ལོ་ ༢༠༠༧ ཕྱི་ཟླ་ ༡ ཚེས་ ༡༡ ཉིན་རྒྱ་གར་ལྷོ་ཕྱོགས་སེ་ར་ཆོས་སྒར་དུ་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་ནས་ཆོས་འབྲེལ་གནང་སྐབས་རྒྱ་གར་ལྷོ་ཕྱོགས་རིས་མེད་ཆོས་སྡེ་ཁག་གི་མཁན་པོ་ལས་ཟུར་དང༌། བླ་སྤྲུལ། དགེ་འདུན་འདུས་པ་རྒྱ་མཚོ། བཙན་བྱོལ་བོད་གཞུང་གི་བཀའ་བློན་ཁྲི་པ་དང༌། ནང་སྲིད་དྲུང་ཆེ། མངའ་ཁུལ་དེའི་ས་གནས་འགོ་འཛིན་སོགས་འགན་ཁུར་བ་དང༌། སྤྱི་སྒེར་ཚོགས་སྡེ་ཁག སེར་སྐྱ་མི་མང་བཅས་ལ་དོལ་རྒྱལ་སྐོར་བཀའ་སློབ་སྩལ་བ།
༸སྐྱབས་རྗེ་ཕ་བོང་ཁ་རིན་པོ་ཆེས་དོལ་རྒྱལ་ཤུགས་ཆེ་བསྟེན་གྱི་ཡོད། ཁོང་ྋགོང་ས་ལྔ་པ་ཆེན་པོ་དང་དོ་མཉམ་པའི་བླ་མ་ཞིག་ཁག་པོ་ཡིན། ས་སྐྱ་པའི་བླ་མ་འགའ་ཞིག་ནས་ཤུགས་ལྡན་བསྟེན་གསོལ་གནང་བའི་ལོ་རྒྱུས་ཡོད་ཀྱང་ཆོས་སྲིད་གང་ཐད་ནས་ྋགོང་ས་ལྔ་པ་ཆེན་པོ་དང་དོ་མཉམ་པ་ཞིག་ཕལ་ཆེར་ཁག་པོ་ཡིན། བོད་སྤྱིའི་བསྟན་སྲིད་འགན་ཁུར་དང་བཀའ་དྲིན་གང་གི་ཆ་ནས་ཡིན་ཡང་ྋགོང་ས་ལྔ་པ་ཆེན་པོ་དང་དོ་མཉམ་པ་ཁག་པོ་ཡིན། གལ་ཏེ་ྋརྒྱལ་བ་སྐུ་གོང་མས་ཚིག་གི་བདག་པོས་ཚིགས་སུ་བཅད་དེ་ཡོད་ན་བསམ་བློ་གཏོང་དགོས་པ་ཡིན། སྐུ་གོང་མས་དེ་ལྟར་གནང་རྒྱུ་ལས་ལྡོག་སྟེ་ྋགོང་ས་ལྔ་པ་ཆེན་པོས་ཐག་གཅོད་གང་གནང་བ་དེའི་ཐོག་ཕེབས་ཡོད། རྒྱུ་མཚན་དེ་འདྲ་ལ་བརྟེན་ནས་དེ་སྔོན་སྐྱབས་རྗེ་ཕ་བོང་ཁ་རིན་པོ་ཆེར་ྋརྒྱལ་བ་སྐུ་གོང་མས་སྐུ་ཚེའི་སྟོད་ལ་གཟིགས་པ་ཆེན་པོ་གནང་སྟེ། ལོ་རེའི་རྨེ་རུའི་དཔྱིད་ཆོས་དགའ་ལྡན་ཁྲི་པས་གནང་སྲོལ་ཡོད་ཀྱང༌། སྐབས་ཤིག་ལ་ྋརྒྱལ་བ་སྐུ་གོང་མས་སྐྱབས་རྗེ་ཕ་བོང་ཁ་རིན་པོ་ཆེར་གསུང་ཆོས་གནང་དུ་བཅུག་ཡོད། ཕ་བོང་ཁ་རིན་པོ་ཆེ་ནི་བླ་མ་ཆེ་ཁག་གྲས་མིན། འོན་ཀྱང་སྐུ་གོང་མས་ཕ་བོང་ཁ་རིན་པོ་ཆེར་སྐུ་ཚེའི་སྟོད་ལ་གཟིགས་པ་ཆེན་པོ་གནང་བ་དང༌། ཐུགས་རེ་གནང་ཡུལ་གྱི་བླ་མ་ཞིག་ཡིན། འོན་ཀྱང་དེ་རྗེས་ྋརྒྱལ་བ་སྐུ་གོང་མས་བཀའ་ནན་གནང་ཡུལ་ཞིག་ཏུ་གྱུར་ཡོད། དེ་དག་ནི་ྋསྐྱབས་རྗེ་ཕ་བོང་ཁ་རང་ཉིད་ཀྱི་རྣམ་ཐར་དྲུང་ཡིག་བློ་བཟང་རྡོ་རྗེས་བྲིས་པ་བོད་ནས་པར་བརྒྱབ་པའི་ནང་འཁོད་ཡོད། དེའི་རྒྱུ་རྐྱེན་ནི་དོལ་རྒྱལ་ལམ་ཤུགས་ལྡན་ཁྱབ་སྤེལ་གནང་བའི་གནས་ཚུལ་ཁག་ྋརྒྱལ་བ་སྐུ་གོང་མའི་དགོངས་པར་མ་འཇུག་པར་མ་ཟད། ཐ་མ་དོལ་རྒྱལ་བསྟེན་གསོལ་ཤུགས་ཆེ་ཁྱབ་སྤེལ་གནང་ན་སྐྱབས་འགྲོའི་བསླབ་བྱ་དང་འགལ་གྱི་རེད་ཅེས་བཀའ་ནན་མཛད་པའི་ལོ་རྒྱུས་ཡོད། སྔ་མོ་འབྲས་སྤུངས་སྔགས་ཁང་ནང་དོལ་རྒྱལ་གྱི་འདྲ་སྐུ་ཞིག་ཡོད་པ་དེ་ཡང་སྐུ་གོང་མས་བཀའ་མངགས་ལྟར་འདོན་དགོས་པ་བྱུང་ཡོད།
ྋསྐྱབས་རྗེ་ཕ་བོང་ཁ་རིན་པོ་ཆེས་ཀྱང་སྐབས་དེ་དུས་དོལ་རྒྱལ་བསྟེན་གསོལ་གནང་བ་འདི་ཡུམ་གྱི་ཁྱིམ་རྒྱུད་ཕལ་ཆེར་ཆབ་སྤེལ་གྱི་ཁྱིམ་ཚང་དང་འབྲེལ་བ་ཡོད་པ་དེ་འདྲའི་རྐྱེན་གྱིས་དོལ་རྒྱལ་བསྟེན་གསོལ་གནང་བ་དང༌། ཕྱིན་ཆད་བསྟེན་གསོལ་མཚམས་འཇོག་གནང་རྒྱུ་ཡིན་ཞེས་བཀའ་ལན་ཕྱག་བྲིས་ཕུལ་ཡོད། འོན་ཀྱང་བློ་ཕམ་པ་ཞིག་ལ་ྋརྒྱལ་བ་སྐུ་གོང་མ་དགོངས་པ་གཞན་དོན་དུ་གཤེགས་མ་ཐག་བཀའ་ལ་མ་གནས་པར་དོལ་རྒྱལ་དར་སྤེལ་ཤུགས་ཆེ་གནང་ཡོད། ཐུན་མོང་གི་མཛད་པ་ནས་ཀྱག་ཀྱག་གནང་བ་ལྟ་བུའི་གནས་ཚུལ་དེ་འདྲ་ཡོང་སྲིད་པ་ཡིན། གལ་ཏེ་ྋརྒྱལ་བ་སྐུ་གོང་མས་ྋགོང་ས་ལྔ་པ་ཆེན་པོའི་གསུང་ལ་ཐག་གཅོད་གསར་པ་ཞིག་གནང་ཡོད་ན། དེ་ནི་ཚིག་གི་བདག་པོས་ཚིགས་སུ་བཅད་པ་ཡིན། དེ་མིན་སྤྱིར་བཏང་གི་བླ་མ་ཞིག་གིས་ྋགོང་ས་ལྔ་པ་ཆེན་པོའི་བཀའ་ལ་བསྒྱུར་བཅོས་གཏོང་ཐུབ་ཐབས་མེད།
ངོས་ནས་ྋགོང་ས་ལྔ་པ་ཆེན་པོའི་གསུང་ཁག་ལ་ཆ་འཇོག་བྱེད་ཀྱི་ཡོད། དོལ་རྒྱལ་གྱི་དཀའ་རྙོག་ཐོག་མ་ཐོན་སྐབས་ངོས་ནས་མྱོང་བའི་དཔྱད་པ་བྱས། ཟན་བརྟག་སྒྲིལ། མོ་བརྒྱབ་པ་སོགས་བརྟག་དཔྱད་རིམ་པ་བྱས་ཏེ་ཐག་གཅོད་བྱས་པ་ཡིན། ལྷག་པར་དུ་གོང་གསལ་གྱི་ལོ་རྒྱུས་ཡིག་ཆ་ཁག་རྙེད་རྗེས་ཡིད་ཆེས་བརྟན་པོ་བྱུང་སྟེ་ཐག་གཅོད་བྱས་པ་ཁག་འགྲིགས་སྙམ་པ་དང༌། ྋགོང་ས་ལྔ་པ་ཆེན་པོའི་དགོངས་པ་བསྒྲུབས་འདུག་སྙམ་སྟེ་བློ་བདེ་པོ་བྱས་ཏེ་བསྡད་ཡོད། ངོས་ནས་ྋགོང་ས་ལྔ་པ་ཆེན་པོའི་མཛད་འཕྲིན་གྱི་འཕྲོ་བསྐྱངས་པར་བརྟེན་སྐབས་སོ་སོར་ྋགོང་ས་ལྔ་པ་ཆེན་པོ་དགྱེས་པའི་མཚན་མ་ཡང་ཡང་བྱུང༌། གང་ལྟར་ངོས་ནས་ཐག་གཅོད་བྱས་པ་དེ་དག་བསྲེགས་བཅད་བརྡར་གསུམ་དང༌། ལོ་རྒྱུས་ཀྱི་ཁུངས་དང་བཅས་ཏེ་ཐག་གཅོད་བྱས་པ་ལས། རྙིང་མ་བའི་ངོ་ལ་བལྟས་ཏེ་ཐག་གཅོད་བྱས་པ་མིན་ལ། ཆབ་སྲིད་འཁྲབ་སྟེ་ཐག་གཅོད་བྱས་པ་ཡང་མིན། ཐག་གཅོད་བྱེད་པའི་བརྒྱུད་རིམ་དེ་ལྟར་ཡིན། མ་ཤེས་རྨོངས་པའི་ལམ་དུ་འཕྱན་པ་རྣམས་ལ་ལམ་སྟོན་ཡིན། ཤེས་བཞིན་ཁྱད་གསོད་བྱེད་མཁན་ལ་བཤད་རྒྱུ་གང་ཡང་མེད། སྔོན་མ་ནས་བཤད་ཡོད། དགེ་སྐྱོན་གྱི་བླང་དོར་ལམ་སྟོན་བྱེད་རྒྱུ་ངོས་ལ་འོས་འགན་ཡོད། ཉན་དང་མི་ཉན་དོ་བདག་རང་ཉིད་ཀྱིས་བསམ་བློ་གཏོང་དགོས། དགེ་སྐྱོན་བཤད་པ་ཙམ་གྱིས་ཆོས་དད་རང་དབང་འཕྲོག་གི་མེད། དགེ་སྐྱོན་བཤད་པ་ཙམ་གྱིས་ཆོས་དད་རང་དབང་འཕྲོག་གི་ཡོད་ན་དཔལ་མགོན་འཕགས་པ་ཀླུ་སྒྲུབ་ཀྱིས་དངོས་སྨྲ་བར་དགག་པ་ཤུགས་ཆེ་གནང་ཡོད། འོན་ཀྱང་ཀླུ་སྒྲུབ་ཀྱིས་དངོས་སྨྲ་བའི་ཆོས་དད་རང་དབང་འཕྲོག་པ་མིན། རྗེ་རིན་པོ་ཆེས་དྲང་ངེས་ལེགས་བཤད་སྙིང་པོའི་དབུ་ནས་མཇུག་བར་གཞན་སྟོང་ལ་དགག་པ་ཤུགས་ཆེ་གནང་ཡོད། དེ་ནི་རྗེ་རིན་པོ་ཆེས་གཞན་སྟོང་གི་ཆོས་དད་རང་དབང་འཕྲོག་པ་མིན། ཡིན་མིན་གྱི་གནས་ལུགས་གསལ་བཤད་བྱས་པ་ནི་ཆོས་དད་རང་དབང་འཕྲོག་པ་ཞིག་གཏན་ནས་མིན།
༼བཀའ་སློབ་འགའ་ཞིག་གོང་དུ་དྲངས་ཟིན་ཀྱང་སླར་ཡང་བཀོད་པ་ནི་སྡེ་ཚན་མི་འདྲ་བ་སོ་སོ་དང་ཐད་ཀར་འབྲེལ་བ་ཆེ་བ་དང་། དྲ་རྒྱ་གཟིགས་མི་རྣམ་པས་སྡེ་ཚན་རྣམས་ཐད་སོར་ཐད་སོར་གཟིགས་སྐབས་གནས་ཚུལ་གོང་མ་གལ་འགངས་ཅན་འགའ་ཞིག་མི་མཁྱེན་པའི་དགག་བྱ་འགོག་ཕྱིར་ཡིན་པས་ཟློས་སྐྱོན་མེད་སྙམ་ལ། དུས་ཁོམ་འབྱུང་ན་ཀུན་ལ་ཞིབ་པར་གཟིགས་ན་དགེ་མཚན་ཆེ་བས་དེ་ལྟར་དགོངས་འཇག་འཚལ།༽
